Edimburgo, 1850-Vailima, 1894. Novelista, poeta e ensaísta escocés que escribiu un bo número de crónicas de viaxe, novelas históricas e de aventuras, ensaios e textos líricos.

Moitas das súas obras están ambientadas na Idade Media, aínda que foi o Pacífico o espazo das súas mellores inspiracións. Enfermo de tuberculose, estaba obrigado a viaxar de continuo en busca dos climas máis apropiados para a súa delicada saúde.

Stevenson converteuse nun dos grandes narradores do século XIX e os seus libros teñen entretido a rapaces de moitas xeracións. Escribiu, ao menos, tres obras mestras: A illa do tesouro, A frecha negra e O estraño caso do doutor Jekvill e Mr. Hyde.