Juan Félix Neira Pérez (A Pobra do Caramiñal, 1973) é catedrático de latín no IES Eduardo Pondal de Ponteceso e profesor de Literatura Castelá na UNED da Coruña. Estudou Filoloxía Clásica e Xornalismo na Universidade de Santiago de Compostela e licenciouse pola UNED en Filoloxía Hispánica, Historia e Historia da Arte con premio extraordinario. Gusta da investigación arquivística da que son froito publicacións arredor de Eduardo Pondal, Emilia Pardo Bazán, a endemoñada de Padrón, Francisco Rodeiro, o santuario de Briño ou a espiritada de Gonzar. Con Os mercados e feiras deminicais na terra de Soneira gañou o I Concurso de Memoria Histórica (Vimianzo).

Colabora na edición de La Voz de Carballo coa Costa da Morte como pano temático de fondo. Prepara a tese de doutoramento sobre a arte relixiosa no arciprestado de Seaia.